من خرج من داره

بعد ايام وشهور من اللف والتنطيط والشحططة بين الهوستس .... رجعنا هنا تانى .. ايييييييييييييه .... منها واليها نعود ..

كله ضاع .. كله اتكسر كله اتدمر !!

للأسف الشديد حصل مشكله تقنيه فى البلوج الرئيسى والداتابيز اتلغت والموقع وقع على دماغى !! إحنا فى البلوجر حتى إشعار آخر !! خالص تحياتى :)

هذا هو القطار

دى مقتطفات صغيووووووووووره من مهازل القطارات .... لا تعليق!!

هذا والبقيه تأتى،،،

أخيرأ جالى تاج

من كام يوم لقيت موشو بيمررلى تاج ... وبما انى بذكائى الخارق فهمت ان التاج هو مجموعة اسئله لازم اجاوب عليها .... فانا جاوبت فعلاً .. شكراً يا موشو .

وآدى التاج

هل أنت راض عن مدونتك شكلاً وموضوعاً؟

السؤال من جزئين نقول الأول شكلاً .. حاليا انا راضى نوعاً ما .. بعد التغييرات الجديده اللى عملتها فى البلوج وشايف انها كويسه وبالذات ان انا اللى عملتها بنفسى من غير مساعده.

اما بقى موضوعاً فأنا غير راضى على الإطلاق .. حاسس إنى مقصر جداً فى الكتابه رغم ان عندى كلام كتير عاوز اشارك الناس فيه ... يعنى مثلا موضوع حادثة القطار دى انا كنت مجهز تحقيق مع شوية صور للقطار والإهمال اللى فيه قبل الحادثه .. وبعد الحادثه كان الوقت مناسب جداً إن انا أنزله لكن لسه مكسل !!! عشان كده مش راضى

هل تعلم أسرتك الصغيرة بأمر مدونتك؟

مش كل أفراد الأسره ... أختى بس لأنها هيا اللى مهتمه بالبلوجز نوعاً ما .. بس للأسف مش مهتمه بالبلوج بتاعى !!!

هل تجد حرجاً فى أن تُخبر صديقاً عن مدونتك؟ هل تعتبرها أمرا خاصا بك؟

بالعكس ... انا بحب جداً إنى أقول لأصحابى على البلوج ... يمكن علشان أحمسهم إنهم يدخلوا العالم الجميل ده ..

لكن من ناحية انها أمر خاص بيا فانا بعتبرها من الخصوصيات التى يجب ان يراها الناس .

هل تسببت المدونات بتغيير إيجابى لأفكارك؟ اعطنى مثال فى حالة الاجابة نعم

طبعاً ... وبشكل كبير جداً كمان . المدونات خلتنى اشوف امور كتير من زاويه جديده مش مجرد الزاوية التقليديه بتاعت " وده تأثيره إيه عليا " .. بقيت أحاول أفكر فى أى موضوع من كل الجوانب وأحط نفسى مكان كل الأطراف .. ده غير إنها علمتنى إزاى أتناقش مع الناس وأقول رأيي مع تقبل الرأى الآخر بصدر رحب يعنى مثلا موضوع قانون الطوارئ عندى حصل فيه نقاش كتير سواء على البلوج أو قهوة كتكوت وده علمنى إزاى اتناقش مع الناس .. إزاى أغير وجهة نظرى لو رأيى غلط .. أو احاول اقنع الآخر بوجهة النظر دى لو شايف انها صح

هل تكتفى بفتح صفحات من يعقبون بردود فى مدونتك أم تسعى لاكتشاف المزيد؟

طبعا لا .... انا بحاول ازور مدونات كتير وأقرأ أراء الناس وردود أفعالهم على اللى بيحصل فى الدنيا .. دى أكتر حاجه بتسعدنى فى عالم التدوين ...

ماذا يعنى لك عداد الزوار.. هل تهتم بوضعه فى مدونتك؟

أول ما عملت البلوج كنت مهتم جداً بعداد الزوار ... لكن بعد فتره بدأت أفقد الإهتمام ده .. لحد ما شلته خالص! بس كلام فى سركم بفكر أرجعه تانى !

هل حاولت تخيل شكل اصدقائك المدونين؟ اعترف

حاولت كتير .... والحمد لله شفت ناس كتير منهم سواء فى صور أو فى وثائقى الجزيره اللى اتعرض من فتره .

هل ترى فائدة حقيقية للتدوين؟

أكيد ... التدوين مش مجرد نقل شوية أخبار من جرايد أو عرض لشوية أفكار تافهه ... التدوين دلوقتى عاد وسيلة إعلام مهمة جداً ومصدر مهم لإستقاء المعلومات أكيد عارفين إن بعض الصور والتسجيلات اللى خدوها المدونين أثناء الإنتخابات النيابيه اتقدمت للنائب العام كدليل اثبات على تزوير الإنتخابات ... ده غير إن التدوين وسيله حره لعرض الآراء ووجهات النظر بدون رقابه ... طبعاً التدوين مهم ودى حاجه أظن انه لا يختلف عليها اتنين

هل تشعر أن مجتمع المدونين مجتمع منفصل عن العالم المحيط بك أم متفاعل مع احداثه؟

مجتمع التدوين معجون مع الواقع فىإناء واحد ... بنشوف فى عالم التدوين المجتمع المصرى بكل مفارقاته وإختلافاته .. انا شايف إن مجتمع التدوين ده thumb للعالم المحيط !!

هل يزعجك وجود نقد بمدونتك ؟ أم تشعر انه ظاهرة صحية؟

إطلاقاً .... النقد يسعدنى جداً . النقد لو كان نقد بناء بيسعدنى لأنى بتعلم منه كتير ... بعرف منه اوجه القصور فى تفكيرى .. ولو كان هدام برضه بيسعدنى لأنى بعرف ازاى ارد عليه واطلع صاحبه غلطان !!! لو مفيش نقد فى المدونه هاقفلها لأن لو رأيى هو رأى كل اللى حواليا مش هاستفيد حاجه انى اتعب نفسى فى عرضه ... هاعرض حاجه هما عارفينها يعنى

هل تخاف من بعض المدونات السياسية وتتحاشاها؟ هل صدمك اعتقال بعض المدونين؟

إطلاقاً ... انا أعشق المدونات السياسيه بكافة توجهاتها حتى لو إختلفت مع بعض المدونين سواء فى الرأى أو طريقة عرضه ... التدوين السياسى فى رأيي هو أهم أنواع التدوين وأكثرها استفادة من مميزات عالم التدوين ( السريه ، إنعدام الرقابه .... ) لأن باقى انواع المدونات مبتحتاجش المميزات دى غالباً .. المدونات السياسيه بتشكل نسبة 99% من المدونات اللى باتابعها . اما بالنسبة لإعتقال المدونين فانا شايف ان ده أمر طبيعى جداً وحاجه معتاده من النظام الحالى ومع ذلك صدمنى جداً جداً ... صحيح هما ماعتقلوش بصفتهم مدونين ولكن لأن ليهم نشاطات فى الشارع .. لكن بيتهيألى اللجوء لإعتقال المدونين بصفتهم مدونين ده كرت أخير فى ايد النظام هيلجأله لما تنفذ منه بقية الكروت سواء عاجلا أو آجلاً ..

هل فكرت فى مصير مدونتك حال وفاتك؟

ههههههه ... الصراحة لأ .. يمكن أكتب فى الوصية ان المدونة من أمانه فى رقبة موشو مثلاً أو محمد حبيب أو حتى د. بلوروز لو قبلتها ... لكن لسه لحد دلوقتى مقررتش !!

تحب تسمع أغنية إيه- بلاش صيغة آمال فهمى دى - ما الاغنية التى تحب وضع اللينك الخاص بها فى مدونتك؟

أحب أسمع سكن الليل بتاعت فيروز ... الأغنيه دى بحس إنها طالعة من أعماق قلبى .

آخر سؤال : اكتب اسماء خمسة مدونين ليقوموا بهذا الاستقصاء بعدك

اممممممممم بيتهيألى التاج وصلنى متأخر فالناس كلها أكيد جالها وجاوبته ... لكن نقول ،،،

1 - شمعه

2 - سحابه

3 - مامتكم

ياعم مش لاقى ناس تانيه .... كفايه دول دلوقتى وبكره ادور على اتنين تانيين .... خالص تحياتى ،،،

مجتمع التدوين المصرى

معلش وقتى ضيق جداً مش هاقدر أشرح أو أوضح http://tadween.275mb.com/vb/ منتدى خاص بالمدونين رفعته النهارده .. طبعاً لسه فيه شوية شغل غير الدعايه وتسليم الإشراف لأى حد من المدونين الكبار .. يارب تكون فكره كويسه وتعجبكم

جندى ،، اتنين ، مين يزود

طبعاً كلكم عارفين إن حزب الله فى عملية امبارح قتل 8 اسرائيليين وأسر 2 . ده غير الأسير بتاع الفصائل الفلسطينيه يبقى كده المجموع 3.. اسرائيل فرضت حصار برى بحرى جوى على لبنان .. طبعاً ده بينذر بحالة حرب بين اسرائيل ولبنان أو على الأقل إجتياح للمناطق الجنوبيه . ممكن ده يحصل فعلاً ؟؟؟ هل أمريكا هتسمح لإسرائيل أنها تعمل كده ؟؟ وهل لو إسرائيل عملت كده هيأثر على مصالح أمريكا فى الشرق الأوسط بشرق عام والعراق بشكل خاص ؟؟ وياترى حزب الله هيتمسك بمسألة تبادل السجناء ولا هيخضع لضغط إسرائيل ويقبل المفاوضات ؟؟ هل حكاية الخطف بقت موضه بين فصائل المقاومه على إعتبار ان الخطف وسيله قوية للضغط ؟؟

والسؤال الأهم والأخطر .........هل الخطف ده أصلا صح ؟؟ ( امبارح 20 شهيد فى غزه والنهارده الصبح 27 فى جنوب لبنان بينهم أطفال ) .. ياريت اعرف رأيكم .

أخيراً ... إخلاء سبيل علاء

طبعاً الخبر بايت والناس كلها خلاص عرفته بس انا حبيت اقوله ... فرحان بيه بقى . ولا بلاش افرح ؟؟

النيابة تخلي سبيل علاء أحمد سيف الإسلام في جلسة التجديد

الصورة لعلاء من مظاهرة كنس السيدة

* الصوره والتعليق اللى تحتها من مدونة عالقهوه *

!! موتنا امه

انا معظم صحابى فى كلية الشرطه أو الكليات العسكريه ... انتيمى بيحكيلى موقف حصل معاه ..الموقف ده آثر فيا جامد ... كان راكب عربيته هو واتنين صحابه وزمايله فى الكليه وماشى " مخالف " فى شارع .. وسواق عربيه نقل طالع من شارع جانبى داخل الشارع " داخل سليم فى اتجاه الشارع " السواق متخيلش ان فيه حد جاى مخالف وبالتالى كان هايخبطهم بس ربنا ستر .. السواق بيزعق لصاحبى وبيقوله مش تفتح ... طبعاً صاحبنا دمه فار .. ازاى يقول للباشا كده . نزل هو وصحابه من العربيه ونزلوا السواق وهاتك يا ضرب!وشتايم ايه بقى .. مش طلبة كلية شرطه !! السواق طبعاً قعد يعيط ويقول هاروح القسم .. هاكتب بلاغ .. فواحد فيهم قاله : روح يابن **** قوله فلان بيه ضربنى !صاحبى بيحكى وبيقول بالنص " كان فاكر بروح امه ان المركز هيحميه !! " المهم السواق طلع على القسم وهما وراه .. قابلوا ملازم واقف فى الجنينه بتاعت القسم فالسواق قعد يعيط ويقول ضربونى يابيه . دول لما شافوه بيعيط ماكتفوش ونزلوا فوقه ضرب تانى لحد ما المخبرين جم خدوه .. وهما طلعوا على نائب المأمور " راجل محترم برتبة عقيد " .. بيحكوا للضابط اللى حصل الا والمخبرين داخلين بالسواق .. السواق قعد يعيط ويقول ضربونى يابيه وقالولى يابن ****.. انا امى **** يابيه ؟؟ انا امى **** ؟؟ العقيد قاله دول مش ضباط ؟؟ قاله آه يابيه . قاله يبقى امك ****!! ونزل فوقه ضرب يمكن أشد من الضرب اللى ضربوهوله !! طبعاً صاحبى جاى يحكيلى وهو فرحان بالانتصار على السواق الشرير الوحش .. بس انا لما سمعت الحكايه دى حسيت ان فيه حاجه انكسرت جوايا .. حسيت بنفس الشعور بالذل والقهر اللى حس بيه السواق علشان ملوش ضهر .. حسيت بخنقه فظيعه لما سمعت صاحبى وهو بيقول " كان فاكر بروح امه ان المركز هيحميه !! " .. لو القسم ميحميش الغلابه .. مين يحميهم ؟؟؟؟ وباقوله من حقكوا قانوناً انكم تعملوا كده ؟؟ قالى : " ربنا يخليلنا قانون الطوارئ " ..... ساعتها مقدرتش اقول غير : حسبى الله ونعم الوكيل !!! لمتابعة الموضوع على قهوة كتكوت هنا

شعب إبن ستين ..... !

موقف ظريف حصل معايا من كام يوم .... الساعه واحده ونص بالليل ، ماشى أنا وواحد صاحبى فى شارع رمسيس بنتكلم عن أحوال البلد .. هو مش مقتنع إن اللى بيعملوه الناشطين السياسيين له أى قيمة .. وشايف إن البلوجرز اللى اتحبسوا دول اتحبسوا على قلة فايده وإن الأحوال مش هاتتغير وكده يعنى .. انا بقى بحاول اقنعه بالعكس واقوله ان البلد تستاهل اننا نموت عشانها .. وفى وسط الكلام كنت باقوله بالنص " الشعب المصرى شعب ممتاز .. الناس الغلابه يستحقوا اننا نتعب ونتبهدل علشانهم حتى لو ماكنوش حاسين بينا .. الشعب المصرى بيحب البلد مهما حكامها عملوا فيه .. الشعب المصرى ........ " فووووووووووووووووو ده كان صوت عربيه لانسر موديل السنه دى سابت الشارع كله وعدت جنب رجل صاحبى بخطوه واحده .. ولقيته بيتنفض نفضه مش طبيعيه ... انا افتكرت العربيه خبطته بس لقيته بيزعق ويقول : " ده شعب ممتاز ده .. ده شعب إبن ستين.... يستاهل كل اللى يجراله .. الهى يارب... < متبوعه بالعديد من الدعاوى اياها > ... ايه يابنى فيه ايه ؟؟؟ لقيته بيمد ايده فى قفاه ويطلعلى قشرة موز !!!! صاحب العربيه المحترم مش عاوز يوسخ الشارع فقال يرمى زبالته فى قفا البنى آدمين !!! السلوك ده امثاله بيكره الناس فى البلد وبيخليهم يحسوا ان البلد ماتستاهلش إنهم يتبهدلوا عشانها ...وده شئ مش كويس ابدا فى المرحلة اللى إحنا فيها .... السلوكيات دى لازم تتصلح وبسرعه علشان الناس تقدر توحد جهودها لمواجهة الفساد بتاع الناس اللى فوق .. لكن لما الشعب يعض فى بعضه مش هيفضل فيه حيل يقاوم الفساد بتاع فوق ..... مش كده ولا ايه ؟؟

!!! بالجزمة

فى جلسة أمس الثلاثاء 30 مايو 2006 ... حصلت حاجه عجيبة تبين لنا مدى ما نتمتع به من تحضر ورقى فى اسلوب ممارسة الديمقراطيه فى البلد ده ..فى الجلسة إتهم النائب طلعت السادات ( مستقل ) النائب أحمد عز ( رئيس لجنة الموازنة ) بالتربح من أراضى الدوله واللعب فى البورصة ... مش بس كده ده كان الا يضربة بالجزمة !!! السادات إتهم عز بالحصول على 15 ألف فداااااااااااان من أراضى الدولة على خليج السويس بسعر 5 جنيه للمتر . وعرضها على مستثمرين صينيين بسعر 1000 جنيه للمتر يعنى مكسب200000% .مش بس كده .. وجه السادات الاتهامات لعز بالتلاعب فى البورصة ... قال إن البورصة وقعت ( كده بقدرة قادر ) فنزل سعر حديد الدخيله من 1300 إلى 1030 . وبالتالى أشترى عز 4 ملايين سهم بلغت قيمة أرباحة فيهم مليار و 200 مليون جنيه ! فى ثانية !!!! سؤال بيفرض نفسة علينا ... البلد رايحة فى أى إتجاه ؟؟؟ لما ده يحصل تحت قبة المجلس اللى المفروض إنه المكان الأول للمناقشات الديمقراطية المتحضرة فى مصر ... نستنى ايه بقى بعد كده ؟؟ إزاى نطالب الناس إنها تكون متحضرة فى مظاهراتها .. متحضرة فى إحتجاجاتها . عليه العوض ومنه العوض يا مصر !!! بس بينى وبينكم .. أنا كان نفسى السادات يطول عز !!!!

آه يانى ... الإنتخابات من تانى

معلش انا عارف إنى إتأخرت بس نعملايه بقى .. يقطع الإمتحانات وسنينها . المهم .. أكمل رأييى الشخصى فى موضوع القضاه . الموضوع ده سببه زى ما الجميع عارفين هو الإنتخابات اياها .. بعض القضاه الشرفاء ( وشد 63 خط تحت الشرفاء دى ) أعلنوا رفضهم التزوير .. ورفعاوا تقارير بالتزوير اللى حصل فى لجانهم غصب عنهم .. ده مش بس كده .. افتكر إنى قريت فى جرنان مش فاكر كان ايه إن قاضى لما لقى الكهرباء بتقطع فجأه فى اللجنه بتاعته خد صندوق الأصوات ودخل بيه دورة المياه .. اى والله حصلت !! طبعا الكلام ده مش جاى على مزاج حبايبنا . اوم ايه الراجل الكبير اخد قرار بشد ودن القضاه ... وكان التلفيق المفضوح لـستة قضاه من الشرفاء اللى فوق دول بتزوير الإنتخابات . طيب ليييييييييييييه ؟؟؟؟ فى مصلحة مين ان الإنتخابات تتزور ؟؟ أكيد مش فى مصلحة الإخوان اللى خدوا على قفاهم لحد ما اكتفوا وكل ده بس علشان يدخلوا اللجان يدلوا بأصواتهم . طيب الوفد ؟؟ لو كان التزوير ده كله لصالح الوفد كان زمانه خد الأغلبيه وسيطر على القبه .. طيب لحد تانى من المعارضه ؟؟ اكيد لأ لإن المعارضه بعد كده كلها فرق صغيره متقدرش تلعب اللعب الجامد ده . يبقى لسه ميييييين ؟؟؟ طبعاً عارفين . الحزب الوثـ ... آسف قصدى الوطنى . الحزب اللى ماإكتفاش باللعب من تحت الترابيزه وفوقها وجنبها وحواليها ... لكن كمان لعب لعبه جديده .. ضم المستقلبن علشان يحقق الأغلبية تحت القبة . وكان بيستخدم وسائل غريبه للضغط عليهم علشان يقبلوا يمضوا طلب الإنضمام .. المهم بقى نرجع تانى للقضاه . إختاروا 6 قضاه يشدوا ودانهم علشان باقى اعضاء نادى القضاه يخافوا على ودانهم ..قالوا نحقق مع هشام البسطويسى ( اللى صورته فوق دى ) ومحمود مكى قال ايه محاكمة تأديبية . وبالفعل تم رفع الحصانة عن القضاه وتم استدعائهم للمثول امام المحكمة عن طريق المستشار أحمد رفعت رئيس دايرة الجنايات بمحكمة استئناف القاهرة ..طبعا المجلس الأعلى للقضاء خد القرار ده رغم إنه مخالف لقرار الجمعية الطارئة للقضاة بعدم مثولهم للتحقيق أو سؤالهم أمام أي جهة كانت.. لكن مش مهم .. يمثلوا يعنى يمثلوا . بقولكوا ايه ... دماغكوا مش وجعتكوا ؟؟؟ نكمل بكره .

ارسم ما شئت ولا تخجل فالكفر مباح يا فنان

فى زمن الردة والبهتان

ارسم ما شئت ولا تخجل فالكفر مباح يا فنان

ضع الف صليب وصليب فوق القران

وارجم ايات الله ومزقها فى كل لسان

لا تخشى الله ولا تطلب صفح الرحمن

فزمان الردة نعرفه زمن العصيان بلا غفران

ان ضل القلب فلا تعجب ان يسكن فيه الشيطان

لا تخشى خيول ابى بكر اجهضها جبن الفرس

انوبلال الصامت فوق المسجد اتراه يؤذن بين الناس بلا استئذان

اتراه يرتل باسم الله ولا يخشى بطش الكهان

فارسم ما شئت ولا تخجل فالكل مهان

واكفر ماشئت ولا تسال فالكل جبان

فالازهر يبكى امجادا ويعيد حكايا ما قد كان

والكعبه تصرخ فى صمت بين القضبان

والشعب القابع فى خوف ينتظر العفو من السلطان

اسالك بربك يا فنان

هل تجرؤ ان تكسر يوما احد الصلبان؟

ان تسخر يوما من عيسى او تقذف مريم بالبهتان

مابين صليب وصليب احرقت جميع الاديان

فارسم ما شئت ولا تخجل فالكل مهان

خبرنى يوما حين تفيق من الهذيان

هل هذا حق الانسان؟

ان تشعل حقدك فى الاسلام؟ان تغرس سمك فى القران؟

ان ترسم موسى او عيسى؟ان تهزأ بحبيب الرحمن؟

لن يشرق ضوء من قلب لا يعرف طعم الايمان

لن يبقى شيئا من قلم يسفك حرمات الانسان

فارسم ما شئت ولا تخجل فميعادك ات يا فنان

دع باب المسجد يا زنديق قم واسكر بين الاوثان

سيجيئك صوت ابى بكر ويصيح بخالد قم واقطع راس الشيطان

فمحمد باق ما بقيت دنيا الرحمن

وسيعلو صوت الله ولو كرهوا فى كل زمان ومكان

----------------------------------------

القصيده للشاعرفاروق جويده كتبها فى واقعة

الآيات الشيطانية التى كتبها "سلمان رشيد " لعنه الله

ثم قام الشيخ محمد حسان بتعديل بعض أبياتها لتتناسب مع حادثة الرسوم

مهزلة القضاه

عاوز أحكى موف حصل معايا ... انا يوم الخميس 11/5 كان عندى امتحان ... وبما انى غير قاهرى يدرس فى كلية بالقاهرة فانا من المترددين على ميدان رمسيس بكثافة .. بعد الإمتحان لقيت والدى بيتصل بيا وقبل مايقولى عملت ايه فى الإمتحان لقيته بيقوللى انت فين بالضبط ؟؟ قلتله فى مدينة نصر . قالى خليك عندك !! أوعى تهوب يمة رمسيس أو وسط البلد بحاله دلوقتى ، ابقى تعالى فى قطار بالليل ، واوعى تتكلم فى السياسه ، واوعى تقف فى تجمع حتى لو مع اصحابك ، واوعى واوعى واوعى

طبعاً انا مندهش .. ليه ياوالدى كل ده ؟؟؟ قال فيه مظاهرات فى رمسيس . ليه ؟؟؟ القضاه !!

انا بصراحة مكنتش اعرف عن الموضوع غير طشاش .. بس سألت ، ودورت ، وعرفت !

عرفت ان فيه اتنين نواب رئيس محكمة النقض ... محكمة النقض التى لا ترد أحكامها .. محكمة النقض التى بكلمة منها تبرئ انسان أو تصدر عليه حكما بالإعدام ولا رقيب عليها الا الله .. محكمة النقض التى لا يملك وزير العدل ولا حتى رئيس الجمهورية عزل قضاتها ومستشاريها .. اثنين من نواب رئيسها يحاكمون محاكمة تأديبية !!!

هناك الكثير من الضباب يحيط بالموضوع ... فلماذا البسطويسى ومكى ؟؟ هل لأنهما كانا من القضاه الذين قالوا وبكل جرأه لا لتزوير الإنتخابات ؟؟ هل لأن النظام كان بحاجه الى تأديب نادى القضاه عن طريق معاقبة بعض افراده على طريقة " إضرب المربوط يخاف السايب !! " ؟؟ أم أن الموضوع له أبعاد أخرى ؟؟

نستكمل رصد الوقائع والأبعاد الكامله للموضوع غذاً إن شاء الله